МАГИСТР
МАГИСТР (латынча та£1н1ег - башчы, мугалим) - бакалаврдан кийинки жог. билимдин академиялык даражасы. Жогорку билимдүү, бакалавр даражасы бар, магистратурдан кошумча окуу курсунан өткөн (1-2 жыл), атайын экзамендерди тапшырган жана магистрдик диссертацияны коргогон адамга берилет. М. даражасын алгандар аспирантурага тапшырууга же кесиптик ишмердүүлүккө кирипгүүгө укуктуу. Байыркы Римде «магистр» деп мамлекеттик кызматкерлерди аташкан. Мисалы, «магистр навис» - кеменин капитаны, кол башчы - «жортуул магистри». Байыркы Римде «калк мугалими» деген маанини билдирген «магистр попули» сөзү менен мамлекет башчысын аташкан. Соңку кылымдарда Батыш Европанын университеттеринде докторлуктан төмөнүрөөк окумуштуулук даража катары колдонула баштаган. Дүйнөнүн көптөгөн университеттеринде бакалавр жана докторлук даражалардын ортосундагы даража болуп эсептелет.