КОРГОНУУ
КОРГОНУУ – душмандын артыкчылык кылган күчүнүн чабуулун майтаруу, аны жоготууларга учуратуу, өзүнүн ээлеген позициясын сактап калуу ж-а чечкиндүү чабуулга өтүүгө шарт түзүү максатында колдонулуучу согуш аракеттеринин бир түрү. Коргонуу чабуул коюуга мүмкүн болбогон же максатка ылайык келбеген учурларда колдонулат. Убакыт утууга, бир багыттагы күчтөрдү ж-а каражаттарды үнөмдөөгө, аны м-н башка багыттарда ж-а участкаларда чабуул коюуга шарт түзүүгө мүмкүндүк берилет. Аскер бөлүкчөлөрү м-н бөлүктөрүнүн алдына коюлган милдеттерге ж-а алардын күчүнө жараша коргонуунун стратегиялык, оперативдүү же тактикалык мааниси болот. Кургактагы аскер бөлүкчөлөрүнүн ж-а бөлүктөрүнүн коргонуусу туруктуу ж-а активдүү, ядролук ж-а танкага каршы согушка, жапырт кыргын куралдарына, авиациянын соккусуна, артиллериянын атууларына туруштук берүүгө жөндөмдүү болууга тийиш. Бөлүкчөлөрдүн ж-а бөлүктөрдүн коргонууга өтүүсү душман
м-н түздүн-түз кагылышуунун же кагылышпоонун шартында өтүшү мүмкүн. Азыркы коргонуунун инженердик жабдуулары коргонуудагы бөлүкчөлөрдү, анын турган жерин жапырт кыргын куралдарынан, артиллерия ж. б. соккусунан жашырууга тийиш.