КОЛУМБИЯЛЫКТАР
КОЛУМБИЯЛЫКТАР (өздөрүн к о л о м б и а н о с деп аташат) – эл, Колумбиянын негизги калкы. Венесуэлада, АКШда да жашайт. Жалпы саны 34,5 млн киши, анын ичинде 32,5 млну Колумбияда. Испан тилинде сүйлөшөт. Негизинен католицизмди, ошондой эле протестантизмди (пресвитериандар, баптисттер ж. б.) тутушат. Колумбиялыктардын этностук негизин жергиликтүү индейлер – чибча-муиска, Колумбияга көчүп келген испандардын укум-тукумдары – креолдор, мулаттар ж-а кул катары Африкадан алып келинген негрлер түзгөн. 16-кылымдын 30-жылдарында испандар Колумбияны басып алган. 18-кылымдын аягында жергиликтүү уруулардын көбүн испан баскынчылары кырган же ассимиляцияланган. Негизинен айыл чарбасында (кофе, банан, ананас, тамеки, какао, жүгөрү, буудай, күрүч ж. б. өстүрөт), ошондой эле нефть, тоо кендерин казып чыгаруу өнөр жайында эмгектенишет.