КОЛПАКОВСКИЙ МӨҢГҮСҮ

КОЛПАКО́ВСКИЙ МӨҢГҮСҮ – Тескей Ала-Тоо­нун түштүк капталындагы татаал өрөөн тибинде­ги эң ири мөңгү. Сары-Жаз суусунун оң куйма­сы, Үч-Көлдүн алабында жайгашкан. Узундугу 10 км, туурасы 1–1,1 км, аянты 30,7 км², калыңдыгы 90–120 м, абляцияcынын аянты 9,2 км². Мөң­гүнүн башы деңиз деңгээлинен 4750 м, этеги 3660 м бийикте жатат. Кар чегинин бийиктиги 4300–4350 м. «Тилинин» калыңдыгы 50 м. Мөңгү 1869-жыл­дан бери 1300 мге тартылган. Мөңгүдөн баш­талган суу Үч-Көл суусунун жогорку агымы Са­ры-Чатка сол тараптан куят. Орус генералы Г. А. Колпаковскийдин ысмынан аталган.