БУРАМАЛУУ КЫЙМЫЛ ӨТКӨРГҮЧ

БУРАМАЛУУ КЫЙМЫЛ ӨТКӨРГҮЧ – айлануу кыймылын түз сызыктуу кыймылга айландыруучу механизм. Негизинен эки тетиктен – бурамадан жана буроодон турат. Алар негизги өзгөчөлүктөрүнө, конструкциясынын жөнөкөйлүгүнө, катыш сандын чоӊдугуна, көбүрөөк сүрүлүшүнө жана пайдалуу аракет коэффициентинин кичинелигине жараша колдонулат. Аларда трапециялык, тик бурчтук жана такалма бурама сай жасалат. Конструкциясы боюнча жөнөкөй сүрүлүүчү, гидростатикалык жана шариктүү болуп бөлүнөт. Кийинки 2 түрдө сүрүлүү суюктуктук же тоголонмо болгондуктан, пайдалуу аракет коэффициенти 0,98–0,99 га жетет. Шариктүү бурамалуу кыймыл өткөргүч программа боюнча башкарылуучу станоктордо, самолёттордун шассисин көтөрүп-түшүрүүчү механизмде, автомобилдин рулдук башкаруу системасында жана ар кандай приборлордо пайдаланылат.