БАДМИНТОН

БАДМИНТОН ‒ волан (пластмасса же чачылуу топ) жана ракетка менен ойнолуучу спорт оюну. Ал Байыркы Малайяда пайда болуп, кийин Азиянын башка өлкөлөрүндө ойноло баштаган. Азыркы бадминтон 1872-жылы биринчи жолу Англиядагы Бадминтон шаарында ойнолгон (аты ошондон ). Эл аралык федерациясы 1934-жылы уюшулган, ага 50дөй өлкө мүчө. Дүйнөнүн жеке чемпионаты 3 жылда бир өткөрүлөт. Бадминтонду 2 же 4 киши ойнойт. Оюнчу өз тарабындагы аянтчага воланды түшүрбөстөн, атаандашы тарапка багыттап, аны жыдытат. Тор (бийиктиги 1,5 м) менен бөлүнгөн тегиз аянтчада (командада экиден ойноодо аянты 13,4´6,1 м, жалгыздан ойноодо ‒ 13,4´5,2 м), көк шиберде, пляжда ойноого ылайыкталгандыктан, азыркы мезгилде кеӊири таралган спорттун түрү. Ойноо техникасы жана ыкмасы боюнча тенниске окшош. Шамдагайлыкты, тездикти, чыдамкайлыкты өнүктүрөт.