АШМАРА

АШМАРА, А с п а р а ‒ Панфилов району (Кыргызстан) менен Мерке районунун (Казакстан) чек арасы аркылуу аккан суу. Чүй өрөөнүндөгү Курагатты суусунун оӊ куймасы. Узундугу 108 км, алабынын аянты 1210 км². Кыргыз Ала-Тоосунун түндүк капталынан башталат. Чүй өрөөнүнө чыкканда нугу кеӊейип, тайыздайт. Ири куймалары: Махан, Аршалы ж. б. Жылдык орточо чыгымы 3,31 м³/сек; эӊ көбү 9,66 м³/сек, эӊ азы 1,02 м³/сек. Май айында кирип, сентябрда тартылат. Алабында жалпы аянты 17,8 км² келген 34 чакан мөӊгү бар. Сугатка пайдаланылат. Боюнда Чалдыбар, Ровный, Гранитогорск ж. б. кыштактар жайгашкан.