АТ ЧАБЫШ
АТ ЧАБЫШ ‒ улуттук спорттун түрү. Мелдештер тегиз талаада, түз жолдо же туюк айлампада (ат майданда) өткөрүлүп, күлүктөрдү атайын саяпкерлер таптап, чабандеске чаптырат. Ат чабыш илгертеден эле кыргыз элинин турмушунда өтө маанилүү орунду ээлеп, «а л а м а н б а й г е» деп аталган. 1952-жылдан Ат чабыш мелдешинин эрежеси тартипке салынган. Чабандестер 14 жаштан кем болбошу керек. Мелдешке кунандан
жогорку жаштагы бардык тукумдагы күлүктөр катышып, Ат чабыш аралыгы 20000 мге чейин болот. 1995-жылы «Манас» эпосунун 1000 жылдыгына карата дүйнөлүк тарыхта биринчи жолу алыс аралыкка (Ашхабад ‒ Талас) ат чабылган. Ат чабышта төмөнкүдөй шарттар сакталышы керек: аттын мелдешке катышуусуна уруксат берүүчү ветеринардык мекемеден маалым кат; чабандестин билдирмеси жана жеке номурдун болушу, бир чабандестин бир гана атты чабуусу, мелдеш учурунда аралыкты кыскартууга тыюу салынат, башка атты камчы менен чабууга, жолун тороого болбойт ж. б. Ат чабыш боюнча ар кандай (III, II, I) разряддык даражалар жана наамдар белгиленген.