АТАЙЫН ОРТО ОКУУ ЖАЙЫ

АТАЙЫН ОРТО ОКУУ ЖАЙЫ ‒ кесиптик орто билимдүү адистерди даярдоочу окуу жай. Ал Кыргызстанда КРдин «Билим берүү жөнүндө» Мыйзамынын, КРдин Президентинин указдары менен Өкмөт токтомдорунун ж. б. укуктук актылардын негизинде иш жүргүзөт. Тогуз жылдык билими барлар 3‒4 жыл, орто мектепти бүтүргөндөр 2‒3 жыл окуйт. Негизги милдеттери: инсандын интеллектуалдык, маданий жана адеп-ахлактык жактан жетилүүсүн атайын кесиптик орто билим берүү аркылуу камсыз кылуу; коомдун атайын орто билимдүү кадрларга болгон керектөөлөрүн канааттандыруу. Окуу жайларынын төмөндөгүдөй түрлөрү бар: техникум, кесиптик орто билим берүү жана колледждер (базалык жана күчөтүлгөн деӊгээлдеги программалардын негизинде кесиптик орто билимдүү адистерди даярдайт). Атайын орто окуу жайлары жалпы орто, баштапкы, кесиптик билим берүү программалары боюнча да адистикке окутат. Окуу күндүзгү, кечки, сырттан окуу жана экстерндик формаларда жүргүзүлөт. Окуу сабактары: лекция, семинар, практикалык сабак, лабораториялык иш, текшерүү жумуштары, консультация, өндүрүштүк практика жана кесипке жараша дипломдук иштерди аткаруу формасында ишке ашырылат. Бүтүрүүчүлөргө атайын кесиптик орто билим алгандыгы тууралуу адистик ыйгарылат.