АСТРОФИЗИКA

АСТРОФИЗИКА ‒ астрономиянын асман телолорун, алардын системаларын, Ааламдын пайда болуусун, түзүлүшүн, химиялык тегин, физикалык касиеттерин жана алардын өзгөрүүлөрүн (эволюциясын) изилдөөчү ири бөлүмү. Астрофизикада асман телолорунун нур чыгаруусуна жараша инфракызгылт, оптикалык, ультракызгылт-көк, рентген нурларынын астрономиясы жана аларга ылайык астрономиялык аспаптар колдонулат. А.строфизика изилдөө объектиси боюнча Күн, планеталар , жылдыз аралык чөйрө жана тумандуулук, жылдыздар физикасы, космология, ал эми ыкмасы боюнча астрофотометрия, астроспектроскопия, строколориметрияга бөлүнөт. Астрофизика 20-кылымда жакшы өнүккөн. Ал теориялык жана практикалык болуп айырмаланат. Теориялык Астрофизика асман нерселеринин түзүлүш теориясын түшүндүрүүдө теориялык физиканын закондорун жана маалыматтарын пайдаланат. Практикалык Астрофизикада асман нерселерин изилдөөдө жаӊы ыкма радиотолкуну менен байкоо жүргүзүүчү радиоастрономия пайдаланылат.

Ад.: Аллен К. У. Астрофизические величины. М., 1977; Соболев В. В. Курс теоретической астрофизики. М., 1985.