АСТАТ

АСТАТ (Аstatium), а с т а т и н, At ‒ элементтердин мезгилдик системасынын VII тобундагы радиоактивдүү химиялык элемент, галогендерге кирет. Атомдук номери 85, туруктуу изотобу жок, туруктуурагы At²¹⁰ (Т_1/2=54 с). Висмутка a-нурун таасир этүүдөн радиоактивдүү изотоптору алынат. Биринчи жолу 1940-жылы Э. Сегре, Т. Корсон, У. Мак-Кензи ²¹¹At изотобун алган. Aстат ‒ катуу зат, балкып эрүү t 244°С, кайноо t 309°С. Химиялык касиеттери жагынан полонийге, йодго да окшош, башкача айтканда металлдык жана металлоиддик касиетке ээ. Галогендер сыяктуу эрибеген тузу AgAt жана йод сыяктуу AgIO₃ беш валенттүү абалга AgAtO₃ чейин кычкылданат. Вакуумда жана кадимки шартта оӊой бууланат. Астат электролизде катодго тартылат. Металлдарга (Ag, Au, Pt) жакшы сиӊет. Бул касиети аны таза түрүндө бөлүп алууга мүмкүндүк берет.