АСЕМ БУЮМДАР

АСЕМ БУЮМДАР– I) зергерчиликте көркөмдөлүп жасалган кооз буюм. Алтын, күмүш ж. б. металлдан жасалып, бетине асыл таш (алмаз, бермет ж. б.) чөгөрүлөт. Аларга сөйкө, шакек, билерик, желбирөөч, топчу, төөнөгүч, чолпу ж. б., ошондой эле шөкөттөлгөн ат жабдык, жоо-жарактары, аңчылык буюм жанa музыкалык аспаптар кирет; 2) Кол өнөрчүлүктөгү көркөм жасалга. Боз үйдүн ички-сырткы жасалгасы, үй буюмдары, ат жабуу, улуттук кийим-кече ж. б-га көркөм оюмдар, түшүрүлүп саймаланып, ошондой эле тигүү өнөрүндө зер жипчелер колдонулуп, кооздолуп жасалат. Мисалы, боз үйдүн эң мыктысы – ак өргөөнүн кийизин бордоп, ак чополоп жанa сөөктүн гүлү менен агарткан. Ак тыбыттан кийиз жасап, сыртын ак кездеме менен каптап, ичине чыгдан тартылбай, от жагылбай, аялга жанa эркекке таандык асем буюмдар коюлган. Учурда борбор шаарыбыздагы элдик көркөм кол өнөрчүлүктүн «Кыял» бирикмеси жанa элдик чеберлер жасаган асел буюмдар чет мамлекеттерге экспорттолуп, кыргыз элинин чеберчилик өнөрүн дүйнөгө таанытууда.