АРГАСЫЗ ЗАРЫЛДЫК
АРГАСЫЗ ЗАРЫЛДЫК– жосундун кылмыштуулугун жокко чыгаруучу жагдайлардын бири. Аргасыз зарылдык абалында, башкача айтканда ушундай кырдаалга туш болгон адамдын же башка адамдардын инсандыгына же укуктарына, коомдун жана мамлекеттин кызыкчылыктарына келтирилген коркунучту жоюу үчүн укук менен корголуучу таламдарга зыян келтирүү, эгер бул жагдайларда коркунучту башка каражаттар менен жоюуга мүмкүн болсо, келтирилген зыян тартылбаган зыяндан кыйла аз болсо, кылмыш деп табылбайт. Жазык кодексинде каралган эки топко бөлүнгөн бир катар шарттар аткарылышы зарыл. Биринчи топ – олуттуу коркунучтун булактары: а) табигый күчтөрдүн аракетинен (жер титирөөдөн, селден, суу ташкынынан, өрттөн ж. б.), адамдардын, механизмдердин, айбанаттардын аракетинен жана кыймылынан болушу; б) олуттуу коркунучтун тикелей жана шексиз болушу зарыл. Экинчи топ – олуттуу коркунучту жоюуга болгон аракеттенүү шарттары: а) олуттуу коркунучтун башка жол менен жоюлбашы; б) корголуп калган таламдар зыян келтирилген таламдарга караганда кыйла баалуу жана маанилүү болушу ж. б. Ушул себептен Аргасыз зарылдык кылмыш өлчөмдөрүнүн белгилерине туура келсе да, кылмыш болуп эсептелбейт. Аргасыз зарылдыкка дуушар болгон адамдын аракетинде кылмыштын эң негизги белгиси – коомго коркунучтуулугу жок.
К. Бодобоев, К. Курманов.