АНТВЕРПЕН

АНТВЕРПЕН, А н в е р (фламандча Antwerpen, французча Anvers; фламандча аталышы Aen’twert – верфтин жанында) – Бельгиянын түндүгүндөгү шаар. Аты окшош провинциянын администрация борбору. Шельда дарыясынын жана Альберт каналынын боюнда, Түндүк деңиздин жээгине жакын жайгашкан. Калкы 502,6 миң (шаар айланасы менен 1,2 млн, 2012). Дүйнөдөгү эң ири порттордун бири (2002-ж. 132 млн т жүк ташылган; Европада жүк айлантуу боюнча Роттердамдан кийин 2-орунда). Өлкөнүн ири соода, финансы жана башкы өнөр жай борбору. Түрдүү машина куруу (анын ичинде кеме куруу), түстүү металлургия, нефть ажыратуу, химия, нефть-химия, текстиль, тамак-аш өнөр жайы бар. Антверпен бриллиант сатуунун жана алмазды кырдоонун дүйнөлүк борбору. Королдук асем өнөр музейи (мында голландиялык сүрөтчүлөрдүн чыгармалары да чогултулган); П. П. Рубенстин үй-музейи бар. 1920-жылы VII Олимпиадалык оюн өткөрүлгөн. 16-кылымдын 2-жарымында мааниси боюнча Европадагы 1-соода жана кредит борбору болгон. Стен сепили (16-кылымда соңку готика стилинде кайра курулган) сакталган.