АНДАМАН АРАЛДАРЫ
АНДАМАН АРАЛДАРЫ – Инди океанынын түндүгүндө, Бенгала булуңу менен Андаман деңизинин аралыгында. Индиянын Андаман жана Никобар аралдары союздук аймагынын бир бөлүгү. Аянты 6,7 миң км2ден ашык. Суу астындагы тоолордун чокуларында жайгашкан, түндүктөн түштүккө карай 350 кмге созулат. 204 аралдан турат; ирилери: Түндүк, Ортоңку, Түштүк, Кичи Андаман аралдары. Жээктери өтө тилмеленген, ыңгайлуу бухталары көп. Айрым жээктери коралл рифи менен курчалган. Өтө тилмеленген жапыз тоо рельефи басымдуу; бийиктиги 729 мге чейин (Садл-Пик чокусу). Абанын жылдык орточо температурасы 28°С; жылдык жаан-чачыны 2500 мм. Дайыма жашыл тропик токою өсөт. Жыгач даярдалат. Шалы эгилет. Кокос пальмасы өстүрүлөт; балык кармалат. Түштүк Андаман аралында Порт-Блэр шаары жайгашкан. 2004-жылкы Инди океанындагы жер титирөөгө байланыштуу пайда болгон катуу цунамиден өтө жапа чеккен.