АЛМАСБЕКОВ Сталбек

АЛМАСБЕКОВ Сталбек (15. 9. 1953-жыл, Нарын облусу, Жумгал району, Көк-Ой айылы ‒ 6. 4. 2023-жыл, Бишкек шаары ) ‒ опералык ырчы (тенор), Кыргыз Республикасынын эл артисти (2003). 1970‒1974-жылдары М. Күрөӊкөев атындагы Кыргыз мамлекеттик музыкалык-хореографиялык окуу жайында, 1979‒1983-жылдары Курмангазы атындагы Алматы мамлекеттик консерваториясында билим алган. 1983-жылдан 2023-жылга чейин А. Малдыбаев атындагы Кыргыз академиялык опера жана балет театрында ырчы болуп иштеген. Опера искусствосуна белгилүү, жаркын, оригиналдуу ырчы Сталбек Алмасбеков бай жана өзгөчө кооз үн тембри менен айырмаланып турган. Анын репертуарында опералардагы башкы ондогон ролдор болгон. Дж.Вердинин «Аида», «Отелло», Дж. Пуччининин «Чио-Чио-сан», «Джанни Скикки», Ж. Бизенин «Кармен», П.Чайковскийдин «Пиковая дама», Р. Леонкаваллонун «Паяцы», П. Масканьинин «Сагынуу», «Айылдык абийир» операларынан партияларды, ошондой эле В. Власов, А. Малдыбаев, В. Ференин «Манас» операсынан Сыргактын, Алмамбеттин, «Айчүрөк» операсынан

Күлчоронун; «Ажал ордуна» операсынан Бектур, «Токтогул» операсынан Керимбай, С. Осмоновдун «Сепил» операсынан Туйгун баатыр жана башкалардын партияларын жогорку чеберчиликте аткарган. Вокалистке белькантонун кооз искусствосунда чыгармачылык идеалды тынымсыз изденүү мүнөздүү болгон.

Сталбек Алмасбеков ‒ көптөгөн эл аралык опера фестивалдарынын катышуучусу, Көз карандысыз мамлекеттердин шериктештигине кирген мамлекеттерге жана башка чет өлкөлөргө гастролдорго барып турган. Активдүү концерттик жана гастролдук иш-чараларды өткөрүп, кыргыз вокалдык искусствосун татыктуу көрсөтүп, чет элдик театрлар менен кызматташкан. С. Алмасбековдун демилгеси менен 2002-жылы А. Малдыбаев атындагы Кыргыз улуттук академиялык опера жана балет театрында жаш ырчылар үчүн "Дебют" лабораториясы түзүлүп, анын жетекчилиги алдында, коомдук башталышта өз театр сахналарында, республиканын шаарларында жана башка мамлекеттерде кыргыз опера искусствосун татыктуу көрсөтүп жаткан бир катар таланттуу жаш вокалисттер даярдалган.