АЛАМҮДҮН суусу

АЛАМҮДҮ́Н ‒ Аламүдүн районундагы суу, Чүй дарыясынын сол куймасы. Узундугу 78 км, алабынын аянты 317 км². Кыргыз Ала-Тоосунун түндүк капталындагы Аламүдүн мөӊгүсүнөн башталып, жогорку бөлүгү кууш капчыгай аркылуу шар агат. Чүй өрөөнүнө чыкканда нугу кеӊейип, тайыздайт. Бишкек шаарын аралай түндүккө карай агат. Ага 33 майда өзөн куят. Ири куймасы ‒ Чуӊкурчак (узундугу 19 км). Алабында жалпы аянты 0,8 км²ге жеткен 22 майда көл, 74,2 км² келген 53 мөӊгү бар. Май айында кирип, сентябрда тартылат. Жылдык орточо чыгымы 6,36 м³/сек; байкалган эӊ көп чыгымы 300 м³/сек, эӊ азы ‒ 0,74 м³/сек. Аламүдүн капчыгайынан Чүй өрөөнүнө чыга бериште (Көк-Жар кыштагы тушта) суу бөлүштүргүч курулма курулган. Боюнан Көк-Жар, Таш-Мойнок, Беш-Күнгөй, Аламүдүн кыштактары орун алган. Сугатка кеӊири пайдаланылат.