АЛАМҮДҮН КАПЧЫГАЙЫ

АЛАМҮДҮН КАПЧЫГАЙЫ Кыргыз Ала-Тоосунун ортонку бөлүгүнүн түндүк капталында. Узундугу 50 км, деӊиз деӊгээлинен бийиктиги 1000‒4000 м. Аламүдүн капчыгайы кууш, өтө тереӊ (800‒1000 м). Капчыгайдын баш жагы үч айрыкка бөлүнөт, алар кошулуп, антропоген мезгилиндеги муздук кеӊейткен жайыгыраак (1,5 кмге чейин) төргө өтөт. Аламүдүн капчыгайы улам төмөндөгөн сайын куушурулуп, туурасы 25‒50 мден ашпайт. Капталдары жантык, кээде тик (30‒60°). Чуӊкурчак өрөөнүндө алкымга айланат. Капчыгайдан Аламүдүн суусу агат. Баш жагына шалбаалуу альп жана субальп, төмөнкү бөлүгүнө бадалдуу шалбаа ландшафты мүнөздүү. Капчыгайдан минералдуу суу булактары чыгат. Ал жерге эс алуучу жана дарылануучу жай курулган. Чүй өрөөнүнө чыга беришинде Аламүдүн суу сактагычы курулган. Аламүдүн капчыгайы негизинен жайыт жана туристтик жай катары пайдаланылат.