АКМАТ Рысменде уулу
АКМАТ Рысменде уулу (1891, азыркы Чүй району, Шамшы айылы – 1966, ошол эле жерде) – семетейчи, Сагымбай Орозбак уулунун шакирти. 1930‑жылдардын аягынан Кыргыз мамлекеттик филармониясында артист, өмүрүнүн акыркы жылдары айылында иштеген. Ал өзүнүн «Семетей» айтып калуусун көпчүлүк манасчыларга мүнөздүү кереметтүү түш көрүү салты менен байланыштырат. 1915‑жылы көпчүлүктүн алдында биринчи жолу «Семетейден» үзүндү айткан. 1938-жылы май айында акындардын слётуна чакырылып, «Семетейден» айткан үзүндүсү жогору бааланган. Акматтын айтуусунда «Манас» эпосунан «Манастын Көзкамандардан көргөн жамандыгы» (5 500 сап ыр), «Чоң казат» (3 663 сап ыр) эпизодунан үзүндү жазылган жана анын айтуусунда «Үргөнч» деген ат менен «Семетейден» үзүндү өзүнчө китепче болуп жарык көргөн (1941). «Семетей» боюнча жазылган материалдары «Манастын» төрт томдук курама вариантын (1958‑60) чыгарууда толук пайдаланылган.