АЗОР АРАЛДАРЫ

АЗОР АРАЛДАРЫ – Атлантика океанындагы 9 жанар тоо аралынан (эң чоңу – Сан‑Мигел аралы) жана бир нече рифтен турган архипелаг. Пиреней жарым аралынан батыш тарапта; Португалиянын автономиялуу району. Батыштан чыгышка карай 644 кмге созулат. Аянты 2,3 миң км². Калкы 246,7 миң (2011). Рельефи тоолуу; бийиктиги 2351 мге (Пику аралында) жетет. Фумаролдор, ми­нералдуу жана термалдык булактары бар. Жер титирөө көп болот. Климаты субтропиктик, океандык. Капталдарында субтропиктик тоо токою жана бадалдар (лавр, каштан, арча ж. б.) өсөт. Банан плантациялары, цитрус өсүмдүктөрү, жүзүм өстүрүлөт. Ири шаарлары жана порт­тору: Понта‑Делгада, Ангра‑ду–Эроишму, Орта.