АБСОРБЦИЯ

АБСОРБЦИЯ (лат. absorptio – соруу, сиңирүү) г а з д ы н – газ аралашмасынан газды же бууну суюктуктардын сиңирип алышы. Сиңирүүчү суюктук абсорбент, сиңирүүнүн тескери процесси десорбция деп аталат. Суюктук газды сиңирип алса эритме пайда болот. Десорбция процесси эритмелерден газдарды бөлүп алууда жана абсорбентти мурунку таза абалына келтирүүдө колдонулат. Ар бир абсорбент (мисалы, суу, метанол, суюк азот, этаноламиндин, металл карбонаттарынын, кислоталардын жана жегичтердин суудагы эритмелери) белгилүү гана заттарды сиңире алат. Ошондуктан абсорбция газдардын аралашмаларын бөлүүдө жана тазалоодо пайдаланылат. Негизги өнөр жай процесстери, мисалы, азот, күкүрт кислоталарын алуу (суунун N0₂, S0₃тү сиңирип алышынан), соданы өндүрүү, өнөр жайдан чыккан газдарды зыяндуу аралашмалардан (күкүрттүү суутек, күкүрттүү ангидрид, көмүртек оксиди, көмүр кычкыл газы ж. б-дан) тазалоо абсорбцияга негизделген. Абсорбция физикалык жана химиялык (хемосорбция) болуп бөлүнөт. Хемосорбцияда сиңирүүчү суюктук менен сиңүүчү газдын ортосунда химиялык реакция жүрөт.