АБА МАССАСЫ

АБА МАССАСЫ – атмосферанын төмөнкү катмарында бир өңчөй жалпы касиетке ээ болуп, атмосфералык циркуляция агымдарынын бири менен жылып туруучу абанын чоң көлөмдөгү бөлүгү. Анын өлчөмү горизонталь боюнча океан же материктердин чоң бир бөлүгүндөй аянтты ээлеп, пайда болушу белгилүү бир аймак жанa андагы аба ырайы менен байланыштуу. Ар бир аба массасынын өзүнө гана мүнөздүү аба ырайынын режими болот. Алардын бир аймактан экинчисине оошуп турушунан аба ырайы өзгөрөт. Аба массасы географиялык зоналар боюнча арктикалык (антарктикалык), уюлдук (мелүүн), тропиктик, экватордук болуп бөлүнөт. Бул зоналардын ар биринде аба массасы деңиздик жанa континенттик болуп өз‑өзүнчө ажыратылат. Аба массасы – климатология жана синоптикалык метеорологиялык илимдеринин негизги түшүнүктөрүнүн бири.