АБА БУРАЛГЫСЫ

АБА БУРАЛГЫСЫ пропеллер (лат. propellere - айдоо, түртүү) – айланганда абаны артка шилөө менен тартуу күчүн пайда кылуучу калактуу жылдыргыч. Аба буралгысын 1475-жылы Леонардо

да Винчи сунуш кылган, 1912-жылы Н. Е. Жуковский өрчүткөн. Аба буралгысы кыймылдаткычтын огуна кийгизилген күпчөктөн жана ага бекитилген түрдүү түспөлдөгү калакчалардан турат. Ал учуучу, аба жаздыктуу аппараттарда, аэрочанада колдонулат. Кыймылдаткычынын кубаттуулугуна жараша эки, үч жана көп калакчалуу болуп жасалат. Тартуу күчүн чоңойтуучу жана кубаттуулуктун коромжусун азайтуучу октош (кийиштирилген) жана бири-бирине тескери айланган аба буралгысы пайдаланылат.