АКРОБАТИКА
АКРОБАТИКА (грекче akrobates – бутумдун учу менен басам, бийикке чыгам) – 1) гимнастика тибиндеги спорттук машыгуулар; 2) машыгуулардын көп сандаган топторунан (Акробатикалык секирүүлөр, аял‑эркектин же эки эркектин, 3‑4 эркектен турган топтун машыгуулары, эркек менен аялдын батутта секирүулөру) турган спорт түрү. Акробатика өнөрү Байыркы Египет, Грекия, Рим, Византия, Кытай, Японияда белгилүү болгон. Орто кылымда Акробатиканын кээ бир элементтерин дарчылар, скоморохтор (Россияда), мимдер (Италияда), жонглёрлор (Францияда) аткарышкан. XVII кылымдын аягынан Акробатика циркте кенен тарала баштаган. Акробатика күч көрсөтүү, жерде секирүү, ийинде ойноо, икарийлик оюндар, ат үстүндө ойноо болуп бөлүнөт. Анын айрым элементтери цирктин бардык жанрында, хореография өнөрү менен театр оюндарында да кеӊири колдонулат.
