КАЛАБРИЯ

КАЛАБРИЯ– тарыхый жана aдминистративдик аймак. Италиянын түштүгүндө жайгашкан. Аймак Калабрия уруусунун атынан коюлган. Антикалык коомдо Калабрия азыркы Апулиянын түштүк-чыгышындагы түшүмдүү жарым арал деп аталган. Б. з. ч. 8-кылымда гректер Калабрияны колониялаштыра баштаган. Калабрияга отурукташтыруу негизинен грек колониясы Тарент тарабынан жүргүзүлгөн. Б. з. ч. 272-жылы Калабрияны римдиктер басып алган. Август мезгилинен Калабрия Апулия менен бирге Италиянын 2-аймагын, ал эми Диоклетиан реформасынан кийин Калабрия Италия епархиясынын провинциясын түзгөн. Б. з. 6-кылымынын ортосунан Византиянын бийлиги астында. 7-кылымдын аягында антикалык Калабриянын айрым жерлерин лангобарддар басып алгандан кийин Калабриянын аты бруттий уруулары жашаган Апеннин жарым аралынын түштүк-батыш аймагындагы байыркы Бруттийге берилген. 1130-жылы Сицилия, 1282-жылы Неаполитан королдуктарынын, 1504-жылы Сицилия кош королдугунун (Түштүк Европадагы мамлекет, Сицилия аралы менен Апеннин жарым аралынын түштүк бөлүгү бириккен), 1860-жылы Сардиния королдуктарынын курамына кирген.1871-жылдан Италияга бириккен. 1947-жылдан Калабрия Козенца, Кротон, Катандзаро, Реджо-ди-Калабрия, Вибо-Валентия провинцияларын камтыган административдик аймак (негизги шаары - Катандзаро).