АКАДЕМИК АДЫШЕВ КЫРКА ТООСУ
АКАДЕМИК АДЫШЕВ КЫРКА ТООСУ (1980‑жылдан Кыргыз ССРинин Илимдер академиясынын академиги М. М. Адышевдин ысмында) Ош облусунун түндүк-чыгышында, Тар жана Гүлчө сууларынын аралыгынан орун алган. Терек тоосунан Төө‑Жайлоо ашуусу аркылуу бөлүнүп, түндүк-батышта 110 кмге созулат. Эң жазы жери 50 км. Орточо бийиктиги 3260 м, эң бийик жери 4785 м (Академик Адышев атындагы чоку; түштүк-чыгыш бөлүгүндө). Түндүк-батышка карай басаңдайт. Структурасы герцин бүктөлүү мезгилинде түзүлүп, меридиан багытындагы көптөгөн тектоникалык жаракалар менен тилмеленген. Ири тармактары: Кызыл‑Агын, Жылаңач‑Таш, Көк‑Булак, Кара‑Сороң, Алдаяр ж. б. Кар, муз каптаган шиш чокулуу, түштүк-чыгышына бийик тоолуу гляциалдык же альп, орто жана түндүк-батышына денудация‑эрозиялык, тоо этектерине түрмөктөлгөн жантайыңкы аккумуляция рельефи мүнөздүү. Байыркы муз каптоонун издери түштүк-чыгыш бөлүгүндө көп кездешет. Түштүк-чыгышындагы бийик бөлүгү – девон жана силурдун сланец, кумдук, конгломерат; орто бөлүгү – бор, юра, палеогендин филлит,
серициттүү сланец, кумдук; жапызыраак түндүк-батышы палеоген менен антропогендин кум, чопо, конгломерат тоо тектеринен турат. Бийик чокуларда асылма мөңгүлөр кездешет. Кырка тоого жапыз тоолуу‑талаа, орто бийик тоолуу шалбаалуу‑талаа, шалбаа, бадалдуу токой, бийик тоолуу субальп, альп, гляциалдык‑нивалдык ландшафт алкактары мүнөздүү. Жайыт катары пайдаланылат.