АЙДАРЫМ АРАЛДАРЫ
АЙДАРЫМ АРАЛДАРЫ К а р и б а р а л д а р ы (англ. Windward Islands, исп. Islas Barlovento) – Кариб деңизиндеги аралдар тобу, Кичи Антил аралдар архипелагынын чыгыш бөлүгү. Вест Индияда, Виргиния жана Тринидад а‑нын аралыгында жайгашкан. Ири аралдары: Гваделупа, Мартиника, Доминика, Гренада, Сент‑Винсент, Антигуа ж. б. Рельефи тоолуу (эң бийик жери 1447 м, Доминика а‑нда). Аракеттеги жанар тоолор бар. Тропиктик климат өкүм сүрөт. Бал камыш, цитрус өсүмдүктөрү, кофе, какао, банан плантациялары бар. А. а‑нда жайгашкан өлкөлөр: Антигуа жана Барбуда, Гренада, Доминика, Сент‑Винсент жана Гренадина, Сент‑Люсия, о. эле Улуу Британия, Франция, Нидерланддын ээликтери бар. Жалпы аянты 6 миң км2. Калкы 1,3 млн (1990). Негизги шаарлары – Фор‑де‑Франс (Мартиника а‑нда), Пуэнт‑а‑Питр жана Бас‑Тер (Гваделупа а‑нда), Кастри (Сент‑Люсия а‑нда). Аралдардын түн.-чыгыш пассат шамалына карата ачык жайгашуусунан улам ушундай аталып калган.