АБУ БЕКР КЕЛЕВИ

АБУ БЕКР КЕЛЕВИ (т. ж. белгисиз – 1366) – 1365–66-ж. Самаркандда болгон сарбедарлардын монголдорго каршы көтөрүлүшүнүн жетекчилеринин бири, самарканддык кол өнөрчү Могол ханы Ильяс кожонун 1365-ж. Мавераннахрга жасаган жортуулунда Самарканд эмиринин аскерлери жеңилип, шаардан качып кеткен. Ошондо Самарканддын А. Б. К. башчылык кылган сарбедарлар (фарсча – дарга баш тоскондор) монголдорго каршы көтөрүлүп, аларды чегинүүгө аргасыз кылган. Самаркандда бийлик сарбедарлардын колуна өтөт. Бирок качып кеткен эмир Хусаин сарбедарларды алдап, көтөрүлүш жетекчилерин, алар менен бирге А. Б. К-ни да даргага асып өлтүртөт да, Самаркандда өз бийлигин кайра калыбына келтирген.