АСПИРИН

АСПИРИН (лат. acidum spiricum ‒ салицил к-тасынын алгачкы аталышы) ‒ацетилсалицил кислотасынын коммерциялык аты. 1853-ж. синтезделген. Дарылоо практикасына немец дарыгер Г. Дрезер киргизген. Ал температураны төмөндөтүүчү, сезгенүүгө каршы жана ооруну басаӊдатуучу дары. А. калтыратмада, баш ооруганда , невралгияда , кызыл жүгүрүктө жана башкаларда кеӊири колдонулат. 20-к-дын ортосунда анын антитромбоциттик таасири байкалып, ошого байланыштуу антиагрегант катары кеӊири пайдаланылат. Чоӊ дозада кабыл алганда баш айланат, угуу начарлайт, аллергиялык реакциялар ж. б. болот. Аны тамактан кийин сууга эритип ичүү сунуш кылынат. А. айрым дарылардын (цитрамон, седальгин, алько-прим ж. б.) курамына кирет. Абдан көп колдонулуучу дары болуп эсептелет (мис., Америкада жылына 20 т чамасында пайдаланылат).