АЧЫТКЫЧ КОЗУ КАРЫНДАР

түрдүү морфол., физиол. ж-а биохим. касиеттеги бир клеткалуу козу карындар . Көбүнүн мицелийи жок. Клеткалары тоголок же сүйрү, уз. 8‒11, туурасы 5‒7 мкм. Негизинен бүчүрлөө же бөлүнүү ж-а жыныстык жол м-н көбөйөт. Бүчүрлөөдө энелик клеткада кичинекей өсүндү пайда болуп, ал бара-бара жетилип, өзүнчө клеткага айланат, андан кийин ал энелик клеткадан бөлүнөт. Алардын айрым клеткалары көп учурда биригип, бутактанган тизмекти пайда кылат. Жаратылышта кеӊири таралган, негизинен канттуу азыктарда көп. Кант, спирт, орг. к-талары көп мөмө-жемиш ж-а алардын ширесинде, крахмалдуу заттарда, сүт азыктарында жакшы өрчүйт. Кантты спиртке чейин ачытат. Алар камыр ачытууда, спирт, шарап, пиво, сүт кычкыл азыктарын өндүрүүдө, о. эле кээ бир орг. к-таларды, В тобундагы витаминдерди, белок тоюттарын, микробдук сапаттуу эт алууда колдонулат. Кээ бир түрлөрү зыяндуу (оору козгогучтар, тамак ашты бузуучулар).
Ад.: Коновалов С. А. Биохимия дрожжей. М., 1980.