АЛМАСБЕКОВ Сталбек

АЛМАСБЕКОВ Сталбек (15. 9. 1953-ж. т., Нарын обл., Жумгал р-ну, Көк-Ой айылы) ‒ ырчы (тенор), КРдин эл артисти (2003). 1970‒74-ж. М. Күрөӊкөев атындагы Кыргыз мамлекеттик музыкалык-хореографиялык окуу жайында, 1979-ж. Алматыдагы Курмангазы атындагы мамлекеттик консерваториянын ырдоо классында окуган. 1982-жылдан А. Малдыбаев атындагы Кыргыз академиялык опера ж-а балет театрында ырчы. Ал Дж. Вердинин «Аида», «Отелло», Пуччининин «Чио-Чио-сан», Бизенин «Кармен» операларынан партияларды, о. эле В. Власов, А. Малдыбаев, В. Ференин «Манас» операсынан Сыргактын, Алмамбеттин, «Айчүрөк» операсынан

Күлчоронун; «Ажал ордуна» операсынан Бектур, «Токтогул» операсынан Керимбай, С. Осмоновдун «Сепил» операсынан Туйгун баатырдын ж. б. партияларды жогорку чеберчиликте аткарат. КМШ ж-а чет өлкөлөрдө гастролдо болгон.