АЛИНАЗАРОВ Садык

АЛИНАЗАРОВ Садык [1914, Пишпек шаары (азыркы Бишкек) ‒ 7. 3. 1969] ‒ Советтер Союзунун Баатыры (1943). Советтик Армияга чакырылганга чейин (1942) Фрунзедеги эт комбинатында жумушчу болуп иштеген. Улуу Ата Мекендик согушта 280-аткычтар дивизиясындагы 103-аткычтар полкунун катардагы жоокери болгон.

1943-жылы 25-сентябрда түн ичинде Днепрден биринчилерден болуп сүзүп өткөн. Дарыянын оӊ жээгине плацдарм курган советтик жоокерлер тобу бир түндө душмандын 12 контр чабуулунун мизин кайтарган. Ошондогу эрдиги үчүн Алиназаровго Советтер Союзунун Баатыры деген наам ыйгарылган. Согуштан кийин Бишкек шаарында эмгек жолун кайрадан уланткан.