АЛЕКСАНДР НЕВСКИЙ ЛАВРАСЫ

АЛЕКСАНДР НЕВСКИЙ ЛАВРАСЫ орус князы Александр Ярославич Невскийдин (1221‒1263) шведдерди жеӊишинин (1240) урматына Петр Iнин буйругу менен 1710-жылы Черная дарыясынын (Монастырская) Невага куйган жеринде курулган. Алгач Ыйык-Троицк монастыры деп аталган, 1797-жылдан император Павел Iнин Указы менен ага Александр Невский лаврасы статусу ыйгарылган. Лавранын архитектуралык ансамблине Благовещенск чиркөөсү (1717‒22), Федоров чиркөөсү (1742‒50), Троицк собору ж. б. кирет. Петр I бул жерди дин кызматкерлери‒архиерейлерди даярдоочу жайга айландырууну көздөгөн жана монастырдын иеромонахтарынан аскер-деӊиз флоту үчүн дин кызматкерлери алынган. Анын көрсөтмөсү менен 1724-жылы Александр Ярославич Невскийдин жасаты жана буюмдары Владимир шаарындагы Рождественск монастырынан Алексндр Невсккий лаврына алынып келинген. 1720-жылы монастырдын алдында басмакана ачылган. 1721-жылы Славян мектеби түзүлүп, 1809-жылдан Санкт-Петербург дин академиясына айландырылган. Октябрь революциясынан (1917) кийин Александр Невский лаврасынын мүлкү конфискацияланып, карамагындагы чиркөөлөр жабылган. 1957-жылы Ыйык-Троицк собору кайра ачылган. 1996-жылы Александр Невский лаврасы орус православие чиркөөсүнө кайтарылган. Александр Невский лаврасына орустун атактуу тарыхый инсандарынын (М. В. Ломоносов, А. В. Суворов, М. И. Глинка, П. И. Чайковский , Н. М. Карамзин, Ф. М. Достоевский ж. б.) жана советтик маданият ишмерлеринин сөөктөрү коюлган.

Ад.: Антонов В. В., Кобак А. В. Святыни Санкт-Петербурга. Историко-церковная энциклопедия: В 2т. СПб., 1994‒1996.