АБДЫКАДЫРОВ Рысбай

АБДЫКАДЫРОВ Рыспай (12. 1. 1941, Ош обл., Кара-Кулжа р-ну, Кызыл-Булак айылы – 12. 9. 1994, Ош ш.) – залкар обончу-композитор ж-а ырчы. Көөнөрбөс обондору ж-а аргендей мукам үнү м-н өз кезегинде кыргыз музыка өнөрүнө өзгөчө бурулуш жасаган. Кыргыз ССРинин эмгек сиңирген артисти (1988). 1959–60-ж. Кара-Кулжа элдик театрында, 1962-ж. райондук маданият үйүндө, Жалал-Абад театрында, 1967–69-ж. Кыргыз мамлекеттик филармониясында эмгектенген. 1971-ж. Ош педагогикалык институтунун музыкалык факультетин бүтүрүп, анда окутуучу, 1972-ж. Ош шаардык музыкалык окуу жайында, 1973-жылдан ОшМУнун музыка факультетинде эмгектенген.

1959-ж. «Түгөйүм», «Эсиңдеби», «Ой, бото көз», «Алмашым», «Өскөн жер», «Суусамыр», «Сагынам туулган жер сени», «Койчунун ыры», «Жүрөктү кеттиң жаралап», «Сагынуу», «Таанышыңдай карагын»,«Айтсаң боло», «Ак кайың», «Алтынчы күнү кечинде»,«Биз экөөбүз», «Издейм сени» сыяктуу 400гө жакын көптөгөн мукамдуу музыкалык обондордун автору. Ошондой эле бир нече шакирттерди (Ж. Алыбаев, И. Аманбаев ж. б.) тарбиялап, өз чыгармачылык мектебин түзгөн. 1989-ж. «Ырларым – менин тагдырым», «Жолугарым билгемин» аттуу обондуу ырлар жыйнактары чыккан. 1994-ж. Жалал-Абад шаарында «Рыспай клубу» түзүлгөн. 1994-ж. Ош филармониясына, Кара-Кулжа музыкалык мектебине ысымы ыйгарылган. 1997-ж. Ош филармониясынын алдына эстелиги орнотулган. 2001-ж. Ош ш-ндагы муз. мектепке ж-а көчөгө анын аты берилген. А. тууралуу Б. Боркеевдин «Рыспай» аттуу китеби жарык көргөн (2004), «Ырларым менин тагдырым» автобиографиялык видеофильми (1991), ошондой эле тележурналист Н. Тойчуевдин «Эң жакшы чыгармамды жаза элекмин» (1994) автобиографиялык видеофильми тартылган. Анын эмгектерине, чыгармачылыгына коңшу Казакстан, Өзбекстан, Тажикстан өлкөлөрүндөгү музыка сүйүүчүлөр тарабынан да жогору бааланган. М. Оморова.