АЛЫБАЕВ Мидин

Мидин (7. 11.1917, Нарын обл., Жумгал р-ну, Чаек айылы – 3. 12. 1959, Бишкек) –

акын, сатирик, жазуучу, драматург ж-а котормочу. 1931-ж. Фрунзедеги педтехникумда, 1935- 36-ж. бир жылдык комсомолдук курста окуган. 1936-38-ж. «Ленинчил жаш» гезитинин редакциясында иштеген. 1938-40-ж. Сов. Армиянын катарында кызмат кылган. Согуш жылдарында ж-а согуштан кийин респ. гезит-журналдардын редакциясында иштеген. Чыг. иши 1934-жылдан башталган. «Бактылуу жаштык» (1937), «Ырлар жыйнагы» (1938, 1947), «Ак чүч» (1957) деген ыр китептери жарык көргөн. Акындын поэтикалык мурасы «Мидин» аттуу бир томдукка (1967) басылган. Орус тилинде «Разговор с

современником» аттуу ыр лар жыйнагы (1958) чыккан. Поэмалары «Замандаш менен сүйлөшүү» деген ат м-н 1958-ж. жарык көргөн. Ал өз поэзиясында назик лиризм м-н өткүр сатиралык пафосту, фольклор м-н профессионал ад-ттын салттарын айкалыштыра билген. А-дин мыкты поэ-
тикалык чыгармасы – «В. В. Маяковскийге акындык отчёт» деген поэмасы. «Чыгармаларынын бир томдугу» (1961), «Ачылбаган кат» (1964, 1982, 1987), «Жомоктор» (1965), «Тандалган ырлар» (1967), «Кызыл жылдыз» (1971), «Пьесалар» (1972), «Жомокчу мерген» (1974), «Тандалган чыгармалар» (1977), «Мидин» (1984), «Мидин Алыбаев» (1993) аттуу ырлар жыйнактары чыккан. «Сүйгөнүмдүн сүрөтүнө», «Ойлончу», «Сага», «Бир элес», «Ак келинге» окшогон ондогон лирикалык ырлары белгилүү, «эпиграмма» жанрына кайрылып, «Адабияттык парадын» жазган. А. – бир канча очерк, аңгеме, фельетондордун, «Курорттогу окуя», «Жантектин керээзи» ж. б. драмалык чыгармалардын автору. Прозаик, курч фельетончу, сатирик, таланттуу лирик акын катары кыргыз ад-тынын тарыхында чоң орду бар. Ал чебер котормочу катары А. Пушкин, С. Маршак, К. Симонов, С. Михалков, В. Маяковский ж. б-дын чыгармаларын которгон. Ысмы өзү туулган айылдын мектебине ж-а бир көчөсүнө коюлган.