ЛЕЙКОЗ

ЛЕЙКОЗ (лейко... ж-а ...оз) -лейкемия, ак кандуулук­кан пайда кылуу системасы­нын шишик оорусу. Л-до кан пайда болуучу ж. б. органдарда өсүп жетилбеген клеткалар көбөйүп, организмдин көп функциясы бузулат, жалпы организм жабыркайт. Иммунитет начар­лап, оор кабылдоолорго алып келет. Л. белги­сиз себептен, радиациянын, о. эле айрым заттар­дын таасиринен пайда болот. Л. лейкоциттер­дин көбөйүшүнө жараша - лейкемия, сублейке­мия, алейкемия, клеткалардын морфологиясы­на жараша ретикулёз, миелолейкоз, лимфолей­коз ж. б. болуп бөлүнөт. Л-дун катуу кармаган ж-а өнөкөт түрү бар. Катуу кармаган түрүндө оорулуунун эти ысыйт, ар кандай органдар ка­найт, жараланат, өлүк ткандарга айланат, кан орчундуу өзгөрүүлөргө учурайт. Өнөкөт Л. акы­рындык м-н башталат, оорулуунун эти ысып, шалдырайт, көп тердейт, сөөктөрү ооруйт. Мын­да өнөкөт лимфолейкоз, миелолейкоз, эритре­мия, миелома оорусу көп кезигет. Өнөкөт лим­фолейкоз узакка созулуп, четки лимфа түйүн­дөрү, көк боор чоңоёт. Кандагы лейкоциттер көбөйүп, бара-бара аз кандуулук күчөйт. Л-дун патогенези толук изилдене элек, түрдүү тышкы ж-а ички таасирлерден организмде клеткалык мутациялар пайда болуп, анын натыйжасын­да кан пайда кылуучу клеткалардын нормал­дуу өөрчүүсү бузулат. Дарылоо гематология бөлүмүндө жүргүзүлүп, моно ж-а полихимия терапиясы, моноклоналдык антителалар, жү­лүндү трансплантациясы ж. б. ыкмалар колдо­нулат.