ЛАВРОВ
ЛАВРОВ Кирилл Юрьевич (15. 9. 1925, Ленинград - 27. 4. 2007, Санкт-Петербург) - орус актёру, СССР эл арт. (1972). Соц. Эмг. Баатыры (1985). 1945-ж. Астрахань авиация-тех. окуу жайын бүткөн. 1950-жылдан Киевде Леся Украинка атн. драма театрында иштеген. Киного 1956- жылдан тартылган, аскердик журналист Синцовдун («Тирүүлөр жана өлгөндөр», 1964) ролу м-н таанылган. Илимпоз, космос кемесинин констр-у Башкирцевди («Отту басуу», РСФСРдин Мамл. сыйл., 1974), В. И. Лениндин ролун «Ишеним» (1976) фильминде, «Жыйырманчы декабрь» (1981) телефильминде ойногон. Эки жүздүү, чүнчүгөн карама-каршы мүнөздөгү адамдарга психол. анализ берүүнүн чебери катары Лапиндин («Адамдар, мага ишенгиле!», 1965), Иван Карамазовдун («Бир тууган Карамазовдор», 1969), Гладышевдин («Сүйгөндүгүн айтуу»)
ж-а граф Корнеевдин («Менин жароокер жана назик жырткычым») ролдорун жеткиликтүү ойногон. «Бактылуу узун өмүр» (1967), «Биздин тааныш» (1969), «Чайковский», «Любовь Яровая» (экөө тен 1970), «Океан» (1974), «Башка шаарга саякат» (1980) ж. б. фильмдерге тартылган. «Тынч Дон» романы б-ча тартылган фильминде Пётр Мелеховдун ролу үчүн СССР Мамл. сыйл. (1978), театрдагы ишмердиги үчүн Лениндик сыйл. (1982) алган. «Бандиттик Петербург», «Мастер жана Маргарита», «Ленинград» ж. б. телесериалдарга тартылган. Ленин, 2-даражадагы «Ата Мекенге синирген эмгеги үчүн» ордендери м-н сыйланган.