КӨК БУУРЧАК
КӨК БУУРЧАК – жашылча буурчагынын жакшыртылган сортунун даны. Жаңы кезинде же консерваланган түрдө тамак-ашка пайдаланылат. Консервалануучу буурчакта орточо 16–22% кургак зат, анын ичинде 5–8% кант, 3–7% крахмал, 4–7% азоттуу заттар, 1,5% минерал туздар, 20–40 мг% С витамини, каротин ж-а В витаминдери болот. Консерва сырьёсу катары пайдалануучу көк буурчак дүмбүл кезинде орулат, данынын формасы боюнча ал жылма дандуу, бырыш дандуу ж. б. болуп бөлүнөт. Бырыш дандуу көк буурчактын сабагы анча узун эмес, текши гүлдөп, текши бышат. Сабагы силостолуп, даны консерва заводуна жиберилет.