«КОШОЙ»
«КОШОЙ» – ачык акционердик коом (1992). Кант кызылчасын өстүрүүнүн көбөйүшү м-н Ново-Троицк кант заводун куруу долбоору 1936-жылы СССРдин тамак-аш өнөр жайы комитети тарабынан каралган. 1943-жылы кант заводунун курулушу бүткөрүлүп, кант кызылчасын кабыл алып, алгачкы кант чыгарылган. Заводдун баштапкы кубаттуулугу суткасына 15000 ц кант кызылчасын кайра иштетүүгө мүмкүнчүлүгү болгон. Заводду өндүрүш технологиясынын бардык талаптарына жооп берүүчү ж-а адам эмгегин жеңилдетүүчү жабдуулар м-н жабдуунун натыйжасында ишкананын кубаттуулугу суткасына 32000 ц кызылчаны кайра иштетүүгө жетип, ал Кыргызстандагы эң ири кант заводуна айланган. Ишкана 1979-жылы бал камышты кайра иштетүүнү баштап, республикада кызылча өстүрүү токтогондугуна байланыштуу 1984-жылы толугу м-н бал камышты кайра иштетүүгө өткөн. Ишкананын негизги багыты – кумшекер өндүрүү. 1983-жылы алкоголсуз суусундук чыгаруучу цех курулуп, ишке киргизилген. 2000-жылдан тартып коом кайрадан кант кызылчасынан кант ала баштаган. Реконструкциядан кийин кубаттуулугу суткасына 3000 т кызылчаны кайра иштетүүгө жеткен. Эл аралык «Кыргызстан-2004» көргөзмө-ярмаркасынын Алтын медалы м-н сыйланган.