БАЙГАБЫЛ
БАЙГАБЫЛ – акын. Ушул күнгө чейин дареги белгисиз болуп, эл кыялынын туундусу катарында бааланып келген. Ошол себептүү «Чата кыз менен Байгабылдын айтышынын» бир түрү элдик адат-салт айтышынын үлгүсү катары жыйнакка кирген. Кийинки табылган маалымат боюнча анын Талас өрөөнүнөн чыккан реалдуу акын экендиги, уруусу кытай, кийин солтолорго качып келип, Осоке бийге ырчы болуп жүргөндүгү аныкталган. 1858-жылы таластык Сартбай акын менен айтышып жеңилет. Экөө беттешкен учурда Сартбай 19 жашта (ал 1839-жылы туулган), Байгабыл 40–45 жаш куракта болот. Демек, Байгабыл болжол менен 1818–1820-жылдарда төрөлгөн. Бирок турагы, качан өлгөндүгү, атасынын аты белгисиз. Айрым маалыматтарга караганда табышмактуу айтыштын устаты болуп, бир ашта Көкшалкы байдын Чата кызын жеңип кетет. Айтыш көлөмдүү, анда каршысынын табышмагын жандырууда Байгабылдын акындык дараметинин күчтүүлүгү байкалат. Айтыштын варианттары эл арасына кеңири тараган.