АКИТАШ ТЕГИ
АКИТАШ ТЕГИ – негизинен кальцит (кээде арагонит) минералынан (Са С03) турган чөкмө тоо тек. Курамында кальциттен башка доломит, чопо, кварц, лимонит, глауконит, органикалык заттар ж. б. кездешет. Акиташ теги бардык геологиялык мезгилдердин чөкмө тоо тек катмарларынан жолуктурууга болот. Курулуш ишинде, цемент даярдоодо, металлургияда (флюс катары), агрономияда (кычкылданып кеткен кыртышты нейтралдоодо) жана эл чарбасынын башка тармактарында пайдаланылат. Акиташ теги метаморфизм процессине дуушар болсо – мраморго, бышырылса – акиташка айланат.