АКАДЕМИК
АКАДЕМИК – академиянын анык мүчөсү (мисалы, КР УИАсынын анык мүчөсү). Ал академиянын жалпы чогулушунун жашыруун добуш берүүсү менен шайланат. КР УИАнын ардактуу академиги деген да наам берилет. Академик наамы бир нече чет өлкөлөрдө да бар. Мурун СССР Илимдер академиясынын, союздук республикалардын академияларынын, Москвадагы Ленин атындагы Бүткүл союздук айыл чарба академиясынын (ВАСХНИЛ) академиги – анык мүчөсү деген наамдар ыйгарылган. Азыр кыргыз окумуштууларынын ичинен чет өлкөлөрдүн ар кандай академияларына мүчө (академик) болгондор бар.