АК КУНАС
АК КУНАС (Ciconia) – кунастар уруусундагы куш. Бийиктиги 1 мге жакын. Түсү ак, кара ала, тумшугу менен буту кызыл. Фергана жана Чүй өрөөндөрүнүн талааларында, саздак жерлерде сейрек жолугат. Уясын ири дарактарга салып, бир жылда бир жолу 2–5 жумуртка тууп, балапандарын басып чыгарат. Бака, балык, чычкан, кескелдирик жана курт‑кумурскалар менен азыктанат. Бул куш мындан көп жыл мурун Борбордук Азияда кеңири таралган. Азыркы учурда бардык жерде азаюуда. Анын кескин азайып кетишине саздардын кургатылышы, дың жерлерди бузуп, айдалышы себеп.
1952‑жылдан Кыргызстанда Ак кунасты кармоого тыюу салынган. 1975‑жылы Кыргызстандын Кызыл китебине катталган.