КОММУНИЗМ ЧОКУСУ
КОММУНИ́ЗМ ЧОКУСУ (1962-жылга чейин Сталин атындагы чоку) – Памирдин эң бийик чокусу, илимдер Академиясы кырка тоосунда (Пётр Биринчи кырка тоосу м-н ашташкан жерде). Бийиктиги 7495 м. Капталдарында жалпы аянты 136 км2ге жеткен ири фирн талаалары, мөңгүлөр (Бивачный, Гармо, Памир фирн платосу) бар. Альпинизм өнүккөн; чокуга алгачкы жолу (1933) советтик альпинист Е. М. Абалаков чыккан. Тажикстанда 1999-жылы тажик мамлекеттүүлүгүнүн алгачкы негиздөөчүсү Исмаил Саманинин аты берилген.