МУЗДАТУУ
МУЗДАТУУ - азык-түлүк технологиясынын өзүнчө тармагы. Азык-түлүк консервалоодо кургатуу, туздоо, ыштап сүрсүтүү, антисептик заттар, кант, пастерлөө жана стерилдөө ыкмалары колдонулат. Алар азыктардын сапатын төмөндөтөт, түсүн, даамын, аш болумдуу касиетин
өзгөртөт жана витаминдерин бузат. Тез бузулуучу азыктарды консервалоо ыкмаларынын натыйжалуусу - М. Азык М-да микроорганизмдердин тиричилик аракети төмөндөйт жана ферменттердин активдүүлүгү акырындайт. Ал муздатылган (температурасы 0+4°Сге чейин), тондурулган (температурасы -0,5+-2,5°С) жана дефростацияланган (тоңу кеткен) болуп айырмаланат. М-да муздаткыч заттар колдонулат. Эт, жумуртка, жемиш, сүттөн жасалган жана кондитер азыктары аба менен, балык, куш эти суюктук менен, сүт, каймак, шире, шарап жылуулук алмаштыргыч аппаратта суюктук менен муздатылат, ал эми муздун жардамы менен бөтөлкөдөгү ичкилик жана жашылча муздатылат. Узакка сактоо үчүн азык-түлүк -23°С температурада тоңдурулат. Сактоодо азыктардын сапатын жогорулатуу үчүн ультракызгылт көк, иондоштурулган нурларга кармоо, атайын идиш жана соргуч материал, көмүр кычкыл газы, озон жана антибиотиктер колдонулат. Ушул чараларды М. менен айкалышта пайдаланганда азыктардын сактоо мөөнөтүн узартууга болот.