КОМСОМОЛЬСК-НА-АМУРЕ
КОМСОМО́ЛЬСК-НА-АМУ́РЕ – Россиядагы шаар (1932-жылдан). Хабаров крайынын түндүгүндө жайгашкан. Комсомольск районунун административдик борбору. Амур дарыясындагы порт. Калкы 233,7 миң (2025). Жол тоому. Темир жол бекети. Аэропорту бар. 1932-жылы Пермь кыштагынын ордуна комсомолдор курган. 1932–35-жылдарда Ыраакы Чыгыш, 1939-жылдан Хабаров крайларынын административдик борбору болгон. Ыраакы Чыгыштагы ж-а Забайкальедеги эң ири өнөр жай борборлорунун бири. Кеме (1933; Ыраакы Чыгыштагы эң ири Амур кеме куруу заводу, дизель м-н суу астында жүрүүчү кемелерди ремонттойт, модернизациялайт ж-а курат), машина куруу (мыкты авиация өндүрүш бирикмеси, Су-27, Су-33, Су-35, көп функциялуу Су-80 ж-а Бе-103 амфибия-самолётун чыгарат), кара металлургия («Амурметалл» бул аймактагы эң ири болот эритүүчү завод), нефть ажыратуу, «Элком» (ширетүүчү электроддор), жеңил, тамак-аш өнөр жай ишканалары иштейт. Эки ЖОЖ, театр, край таануу ж-а сүрөт музейи, А. Н. Островский атындагы китепкана (1934; 16 филиалы м-н) бар.