ИО
ИО (Iо) – Юпитердин жандоочусу. 1610-жылы Галилей ачкан. Чоң жарым огу 421600 км, диаметри 3630 км, тыгыздыгы 3570 кг/м3. Ио менен Европанын, Айдын өлчөмү бирдей, ал эми Ганимед менен Каллистодон кичине. Америкалык «Вояджер» космос аппараты тарткан Ионун бетинин
сүрөтүндө бийиктиги 9 кмге чейин аска сыяктанган тектердин бетин каптап жаткан ачык түстөгү күкүрттүү катмар, атылып турган жанар тоолор жакшы көрүнүп турат. Ио бетинде жаңы катмарлар пайда болуп турат жана кызгылтым темгилдер да бар, алар түпкүрдөн бууланып чыккан туздар деп божомолдонот. Анын адаттан тышкары өзгөчөлүгү – аны курчап турган калың газ булуту. «Пионер-10» космос аппаратынан алынган маалыматтар боюнча Ионун сейрек атмосферасы жана ионосферасы да бар.