МҮНӨЗДӨМӨ
МҮНӨЗДӨМӨ - каармандарга, ар кандай көрүнүштөргө, буюм-теримдерге берилген баа, алардын башкы белгилерин мүнөздөп берүү. Эгерде М. автор тарабынан берилсе - автордук М., каармандар өз сөздөрү менен мүнөздөсө - речтик М., каармандын бири экинчисинин сапат белгилерин көрсөтсө - каармандар аркылуу берилген М., автор тышкы портрет менен ички белгилерди бирдей ачып көрсөтсө - жалпы М. деп аталат. Мисалы, «Ошол күнү Маргалаңдын базар күнү эле. Календер аса таягын тык-тык уруп, жай сенделе басып, өзүнчө басмырт күңкүлдөп, базарга чыгып кетти. Өзүнчө күңгүрөнүп, өзү менен өзү сүйлөшүп, ыйлай тургандай эки көзү тунарыңкы жашылданып, алдынан жүдөө бирөө көрүнсө, чөнтөгүндөгү Исхактын ысмы бар алтын теңгелерден бирден ыргытып берип коюп, алардын кубанганына да, таңыркаганына да, алкаганына да карабай, көңүл бөлбөй, бир баскан жерин үч басып, чоң базарды аралап жүрдү» («Сынган кылыч», Т. Касымбеков). Бул үзүндүдө жазуучу каарманынын иш-аракетин, жүрүштурушун мүнөздөп жатат.