БАЯНДАМА

БАЯНДАМА – ар кандай саясий, социалдык, экономикалык, маданий, эл аралык, аскердик, спорттук жана башка окуялар менен көрүнүштөрдү талдап кароочу гезит-журнал макаласы. Ал мезгилдүү басма сөз пайда болгондон мурда эле колдонулуп келген. Аны Плутархтын тексттеринен (I–II кылым), кытайлык Ван-Ан-Хинин (II кылым) дидактикалык баяндамаларынан, Монтендин (XVI кылым) «Тажрыйбаларынан» жана Луис Себастьян Мерсьенин (XVIII кылым) «Парижди баяндоо» аттуу китебинен табууга болот. Азыркы учурдагы баяндама – радио уктуруу жана телекөрсөтүүдө өзүнчө рубрика. Кыргыз телерадиосу, «Замана», «5-канал», «Независимое бишкекское телевидение», «Пирамида» телеканалдары боюнча «Ала-Тоо», «Апта», «Жаӊылыктар убактысы» («Время новостей»), «Спорт мозаикасы» жана башка маалыматтык-талдоо программалары аркылуу ар кандай баяндамалар берилип турат.