ЛАБОРАТОРИЯЛЫК ИШ

ЛАБОРАТОРИЯЛЫК ИШ - окутууну уюшту­руу формаларынын бири, сабактын бир бөлүгү. Көбүнчө окуу лабораторияларында өткөрүлүп, теор. билимди бекемдейт ж-а терендетет, о. эле эксперимент жүргүзүүгө көнүктүрөт. Атайын көрсөтмө б-ча окуучулар же студенттер тех. ку­рал-жабдыктарды колдонуу м-н тажрыйбаларды өткөрөт ж-а байкоо учурунда маалыматтарды салыштырууну, корутунду жасоону үйрөнүшөт. Ой жүгүртүү иш-аракет м-н айкалышып, окуу­чулар тех. каражаттардын жардамы аркылуу окуп-үйрөнүп жаткан заттарга ж-а материалдар­га таасирленүү м-н өздөрүн кызыктырган кубу­луштарды байкашат. Акыл эмгегин физикалык иш-аракет м-н айкалыштыруу таанып-билүү про­цессинин натыйжалуулугун жогорулатат. Окуу­чулар жасаган тажрыйбаларында окуу китеби­нен алган билимдерин бышыктайт же изил­дөөчүлүк планда, алдына коюлган таанып-билүү тапшырмаларын аткарышат, тажрыйбалардын негизинде илимде буга чейин белгилүү болгон жыйынтыктарга күбө болушат. Айрым учурда окуучулар буга чейин белгилүү болбогон, сынал­баган жактарын издеп табышат, себептерин аныкташат. Л. и-ти өткөрүүдө окуучулардын эксперимент жүргүзүү техникасын өздөштүрүүсү маанилүү. Окуучулар эң жөнөкөй куралдарды өздөштүрүүгө, монтаждоого ж-а алар м-н иш­төөгө үйрөнүшөт. Л. и-ти жекече, экиден болуп, же топко бөлүнүп аткарууга болот. Топко бө­лүнүп иштөөдө ар бир окуучу аткарган иши м-н бирге белгилүү билимди ж-а билгичтикти өз­дөштүрүүсү зарыл. Л. и-тин нускамасы оозеки же жазуу жүзүндө берилиши мүмкүн. Алгач нускама бөлүктөр м-н берилет. Бара-бара окуу­чулар татаал нускамалар м-н иштөөгө үйрө­нүшөт.